HSD: 2 dron hatin xistin
Hewlêr (Rûdaw) – Hêzên Sûriyeya Demokratîk (HSD) ragihand ku li Dêr Hafir û Bendava Tişrînê 2 dron hatine xistin.
Komên çekdar ên ku navê “Artêşa Niştimanî ya Sûriyeyê” li xwe dikin û Tirkiye piştgiriyê dide wan êrişên xwe yên li derdora Bendava Tişrînê û Pira Qereqozaqê didomînin.
Hêzên Sûriyeya Demokratîk (HSD) bîlançoya şer û çalakiyên 24 saetên dawî eşkere kir.
Li gorî daxuyaniyê, êrişên Tirkiye û çekdaran doh zêdetir bûne û balafirên şer ên Tirkiyeyê derdora Bendava Tişrînê û cihên karkeran ên li Bendava Tişrînê bombebebaran kirine.
Di heman demê de gundên derdora bendavê jî bi obusên giran hatine topbarankirin.
HSD daxuyand ku di encama topbaran û bombebaranê de zererên madî çêbûne û şervanên 2 dron xistine ku hewl dida êrişî derdora bendavê bikin.
Li gorî daxuyaniyê, balafirên şer ên Tirkiyeyê li gundên Tîna û Xeseq û Girê Sêvê yên li eniya Pira Qereqozaqê êriş pêk anîne xisar li mal û milkên şêniyan bûye.
Hat diyarkirin ku gundên Tîna, Cada, Pîr Hiso, Dîkan, Sina, girên Sêvê û Qereqozaqê bi obusên giran, tank, roket û hawanan bi awayekî ketober topbaran kirin û zêdetirî 10 topan li deverên navborî ketine û zererên mezin li mal û milkên sivîlan bûne.
Hêzên Sûriyeya Demokratîk ragihand ku balafirên şer ên Tirkiyeyê rojavayê Qesra Ehmed Munîr a li bajarokê Şiyûxê yê rojavayê Kobaniyê jî bombebaran kiriye û xisarên madî çêbûne.
