RIHA – Hişkesaliyê zerereke mezin da çandinî û…
Hewlêr (Rûdaw) – Li parêzgeha Rihayê ya Bakurê Kurdistanê hişkesaliyê zerereke zêde daye cotkaran.
Erdên çandiniyê yên li parêzgeha Rihayê kesk nebûn.
Cotkaran hebûn û nebûna xwe li erdan xerc kiriye û dexl û dan çandine.
Erdên ku ceh, genim û nîsk lê hatine çandin kesk nebûne û ji ber nebûna baranê hemû şewitîne.
Li parêzgehên Riha, Kilîs, Dîlok, Semsûr, Mêrdîn û Amedê hişkesaliyê zerereke zêde daye cotkaran.
Cotkarên gundê Simaqiyê daxwaza alîkariyê dikin.
Cotkar Omer Dolap got:
“Em perîşan bûne li van deran. Em dê çawa deynên xwe bidin.
Gubre, derman û mazot hemû bi deyn e. Deyn û deyn, ka em dê binêrin wê dawî çawa be.
Eger dewlet alîkariya me neke em dê çawa bikin.
Hişkesalî heye û ji meha 11an ve baran nebariyaye.
Em nizanin em dê çi bikin. Halê cotkaran ev e.”
Hişkesaliyê bandor li çol û çêr û mêrgan jî kiriye û sektora ajeldariyê jî zerereke zêde dîtiye.
Cotkarên li gundan dijîn bi du aliyan zerer kiriye û keriyên xwe li erdên ceh û genim ên ku derneketine diçêrînin.
“Qet baran nebariya”
Cotkar Îsa Demîr jî li ser hişkesaliyê qala derd û kulên xwe kirin.
Cotkarekî din jî anî ziman:
“Ji bo berheman qet baran nebariya. Tene hişk bûn û ajeldarî jî mir.
Ne ka û ne êm, em dê çi bidin ajelan. Ajel dê li kû derê biçêrin.
Her kes dê ajelên xwe bifiroşe.”
Li aliyê din, di rojên dawî de bi kêmbûna pileyên germahiyê re qeşayê li darên fistiq û behîvan daye û vê yekê jî yekcar rewşa cotkaran xirab kiriye.
Tîmên Saziya Çandinî û Daristanê ya navçeya Xelîliyeyê ya Rihayê gund bi gund digerin û zerera cotkaran tesbît dikin.
Wezareta Çandinî û Daristanê ya Tirkiyeyê ragihand ku qeşayê li 34 bajarên Tirkiye û Bakurê Kurdistanê zerer daye berhemên çandiniyê.
