Boksorê Kurd Badîn Heso: Ez wekî şêrê Kurd têm…
Dihok (Rûdaw) – Kurdên li seranserê cîhanê wekî qehremanekî neteweya xwe serbilindiyê bi bokser Badîn Heso dikin.
Boksor Badîn Heso 31 salî ye û Kurdekî Êzidî ye.
Badîn Heso boksorekî Kurd e ku niha li Amerîkayê dijî û perwerdehiya xwe li gel rahênerekî Amerîkî didomîne.
Heta niha di her sê maçên xwe yên profesyonel de bi ser ketiye.
Badîn Heso ji Rûdawê re got, “Ez bi navê Şêrê Kurd têm naskirin, çimkî her car bi Alaya Kurdistanê diçim ser qadê.
Min 20 pêşbirk kirine û di hemûyan jî de jî bi ser ketim.
Di 10 ji wan de min beriya dema diyarkirî lîstik biriye û zora rikeberan biriye.”
Malbata Badîn hin dema ew yek salî bûye koçî Almanyayê kiriye û ew li bajarê Halleyê mezin bûye.
Bi teşwîqa malbata xwe di 9 saliya xwe de dest bi bokseriyê kiriye.
Badîn Heso li Almanyayê 107 maç lîstine û li hemûyan bi ser ketiye.
Ji ber serkeftinên xwe yên berdewam niha li Ewropayê di kategoriya nûgihiştî de di rêza yekem de ye.
“Ez şampiyonê Ewropa hem jî yê Almanyayê me”
Bakserê Kurd niha li bajarê Dihokê ye û ji Rûdawê re got, “Min du qehremaniyên mezin bi dest xistine ya yekem Şampiyoniya Almanya û duyem jî Şampiyoniya Ewropayê ye.
Her du jî min bi dest xistine û li Almanya û Ewropayê ez bûme yê yekem. Ez dixwazim di vê lîstikê de navê Kurdistanê bigihînim lutkeya serketinê.”
Bokserî lîstikeke şer e ku du lîstikvan bi rêya kulman pêşbirkê dikin da ku rikeberê xwe bixin erdê û puanan kom bikin.
