Li Kerkûkê bahoza tozê: 119 kes nexweş ketin

Hewlêr (Rûdaw) – Birêvebiriya Tenduristiyê ya Kerkûkê ragihand ku ji ber bahoza tozê ya ku ji şeva borî ve didome 119 kes sewqî nexweşxaneyan hatine kirin.

Rayedaran diyar kir ku hemû nexweşan tedawiya pêwîst wergirtiye û ti zererên canî çênebûne.

Li Kerkûkê doh danê êvarê ji ber bahoza tozê gelek kesan astengiya bêhnkişandinê jiyan.

Beriya bahozê saziyên tenduristiyê ji bo rewşên bilez amadekarî kiribû.

Rayedaran eşkere kir ku 119 kesên ku sewqî nexweşxaneyan hatine kirin tedawiya pêwîst wergirtiye.

Berdevkê Birêvebiriya Tenduristiyê ya Kerkûkê Saman Yaba ji Rûdawê re ragihand, piraniya kesên ku serî li nexweşxaneyan daye li navenda bajêrê dijîn.

Ji ber bahozê 23 kes sewqî Nexweşxaneya Perwerdeyê ya Azadiyê, 36 kes sewqî Nexweşxaneya Perwerdeyê ya Kerkûkê û 60 kes jî sewqî Nexweşxaneya Giştî ya Daqûqê hatine kirin.

Pisporê Keşnasiyê Mihemed Kemal da zanîn ku bahoz ji ber bayê ku ji Rojavayê Kurdistanê tê pêk hatiye û bandor li Kerkûk û Germiyanê kiriye.

Rayedaran eşkere kir ku bahozê heta saet 07:00ê sibehê berdewam kiriye lê îro bandora wê nemaye.